O le Haka

O nei aso, o le tele o tagata Niu Sila e lē o ni Māori, e lē o tele se mālamalama’aga i le tāua o le Haka, ma o le to’atele, na o le Haka lea e māsani ona fa’atino e silafia uma, o le “Ka mate, Ka mate”, le Haka na tusia i le vāitau o le 1820 e Te Rauparaha – se ali’i tāua o le Ngati Toa, se tasi o alaalafaga (iwi) o tagata Māori. E tele ‘auta‘a‘alo ma tagata ta‘a‘alo a Niu Sila e malaga atu i fafo, ua fuafuaina le fa‘aaogāina o le Haka lea o le “Ka mate” i le lātou polokalame. O le ‘auta’alo ua sili ona lātou fa’alauiloaina le haka i atunu’u i fafo, o le All Blacks; e fa’atino e le All Blacks le haka a o le’i ‘āmataina ta’aloga fa’avāomālō (test matches). Ua avea nei ma se maimoaga fa’apitoa a le All Blacks.

 

 

‘Amataga o le Haka

I talatu’u fa’a-Māori, o Tama-nui-to-rā, le atua o le lā, sa lua ana masiofo: Hine-raumati, le taupou o le tau māfanafana; ma Hine-takurua, le tausala o le tau mālūlū. Na fānau e Hine-raumati le tama o Tane-rore, o ia lea na māfua ai sivatau. O Tane-rore, o le māluelue o le savili e va’aia i aso vevela, ma o lo’o atagia lea va’aiga i taimi e tete ai lima o le haka.

 

O le haka, o le upu Māori lea mo le sivatau. I nei aso, ua iloga o se siva patino lava i le itupā o ali’i, ina ua tūtū i luma ali’i, ‘ae lagona le leo o tama’ita’i o lo’o ‘alaga mai i tua. O le tele lava o haka i nei aso, e ta’ua o le haka taparahi; o lona uiga, o sivatau e aunoa ma ‘au’upega.

 

E ‘ese mai lava lea aganu’u fa’a-Māori, ona o se fa’atinoga e momoli mai ai le mitamitaga, le loto fīnau, ma le fa’asinomaga o ona tagata. O le haka e ‘ese lona tāua i tū ma aga a tagatānu’u, ‘ae maise o taimi o taliga mālō ma fa’afiafiaga. O le ta’uleleia ma le ta’uta’ua o se alaalafaga (iwi), o le lelei o le fa’atinoga o se lātou haka.

 

O le tāua o le haka, o se tasi ‘auala o tala’aga, e fa’ailoa atu atugaluga o se alaalafaga (iwi), o fe’ese’esea’iga ma fete’ena’iga, fa’apea fo’i ma mea na tutupu i le olaga o le alaalafaga.

 

Talafa’asolopito o le Haka

O le tāua o le haka i talatu’u a le All Blacks, e lē o se mea fou. Talu le 1888, i le malaga ta’amilo a le ‘aufili muamua a Niu Sila, le New Zealand Natives – sa ta’ita’ia e Joseph Warbrick – sa avea ai loa le haka ma se tasi o itū tāua o le lakapī a Niu Sila. O lona tāua ua fa’aopoopoina fa’atasi ai ma le tulaga maualuga o le finafinau, ma le ta’alo mālosi, fa’apea fo’i le tomai; o itū ia ua fa’amaufa’ailoga aloa’ia ai le ta’aloga a Niu Sila.

 

O le haka ua fa’aopoopoina ai se vāega e tulaga ‘ese, e āfua mai i tagata Māori, o tagatānu’u o Niu Sila, ma e fa’atusatusa ma aganu’u a isi atunu’u o le Pasifika.

 

E fa’atino e le All Blacks le haka i le ‘āto’atoa ma le mālosi, o itū ia e ta’uta’ua ai le ta’a’alo a le All Blacks.

 

Ka Mate

O le haka, Ka Mate Ka Mate, sa tusia e se matai tāua mai le Ngati Toa, o Te Rauparaha, i le vāitau o le 1820. O le tala o le haka nei o se talatu'u ua lauiloa ai e alaalafaga (iwi) nei o Ngati Toa ma Ngati Tuwharetoa.

 

O le haka ua fa’aopoopoina ai se vāega e tulaga ‘ese, e āfua mai i tagata Māori, o tagatānu’u o Niu Sila, ma e fa’atusatusa ma aganu’u a isi atunu’u o le Pasifika.

 

I se tasi o taua, sa tuliloaina Te Rauparaha e ona fili, ‘ae sa ‘ave e Te Wharerangi – se tasi ali’i o Tuwharetoa – ma fa’alafi i le utu o lo’o teu ai ‘umala, ma fa’atonu lana avā, o Te Rangikoaea, e nofo ai i luga. Sa ta’ita’i e o lātou Tagata Atamamai (Tohunga) nisi o le ‘autau e sā’ili Te Rauparaha. Ina ua latalata ane, sa memu ane e Te Rauparaha upu nei “Ka Mate Ka Mate” (o le oti, o le oti). Sa iai le talitonuga, o le mana o ilāmutu o mea’ai, ma le fafine sa nofo i luga o le utu, sa avea lea ma ala sa nātia ai ma le’i mauaina ai Te Rauparaha e ona fili. Ina ua fa’alogo atu Te Rauparaha ua mou atu le ‘autau, ona ia fa’apea ane lea “Ka ora Ka ora” (ua ola, ua ola). Ina ua ō ‘ese fili a Te Rauparaha, sa ia ulu atu i fafo mai le utu, ma fa’apea atu “Tenei te tangata puhuruhuru, nana nei i tiki mai whaka whiti te ra.”

 

E tele lava fa’auigaina o nei fuaitau, ma o le “tangata puhuruhuru” ua fa’auigaina e nisi o le tamāloa fulufulua (o Te Wharerangi). ‘Ae o le mau a Ngati Toa, o nei fuaitau o le amana’ia e Te Rauparaha le mana fa’ailāmutu a Te Rangikoaea ina ua ‘a‘e mai luga (Upane, Kaupane) mai le pogisā o le utu, i le mālamalama o le lā (Whiti te ra! Hi!)

 

O le Ka Mate sa mua’i fa’aaogā e le ‘au a le New Zealand Natives i le lātou malaga ta’amilo ‘ūmī ma le faigata i le 1888/89; e muamua ona fa’aaogā a se ‘au All Blacks i le 1905, le “Original” All Blacks.

 

Talu mai lenā taimi, sa fa’atino le haka a o le’i ‘amataina ta’aloga, mo ta’aloga fa’avāomālō (test match) e fai i atunu’u i fafo, se’ia o’o lava i le 1986, ina ua finau mālosi e Wayne “Buck” Shelford ma Hika Reid i le fa’aaogāina o le Ka Mate i ta’aloga fa’avāomālo i totonu o Niu Sila. Sa lā taumafai fo’i ina ia fa’atino le Haka i le ‘āto’atoa ma le mālosi e tatau ai, ona sa le’i ‘āto’atoa ona fa’atino i tausaga ua mavae.

 

Kapa o Pango – O le Haka lava a le All Blacks

O ‘Aukuso 2005, i le ta’aloga fa’avāomālō (test match) a le Tri-Nations ma Aferika i Saute i le malae i Carisbrook, o le taimi muamua lea sa fa’aaogā ai e le All Blacks le Kapa O Pango, o le haka fou na tusia fa’apitoa ma fa’atatau tonu lava i le All Blacks.

 

E tasi le tausaga sa taumafai lenei galuega. O le Kapa O Pango na tūsia e Derek Lardelli, o se tagata ua lava le silafia i tū ma aga fa’a-Māori, mai le alaalafaga (iwi) a Ngati Porou. O ‘upu ma tāga o le fa’ailoga e fa’amanatu ai laufaunua o Niu Sila, le laugasēsē siliva (silver fern), ma tamatau e lā’ei uliuli. O le fa’aliliuga faigofie o le igoa o le haka, e fa’apea: o le ‘au lā’ei uliuli.

 

Sa saunoa le Kapeteni o le ‘au i lenā taimi, Tana Umaga, ina ua fa’asilasila aloa’ia le haka o le Kapa O Pango i le mafua’aga sa fa’aopoopo ai.

 

 

E le’i suitūlaga le Kapa O Pango i le haka māsani o le Ka Mate, a o le fa’amoemoe, ina ia iai se isi haka e fa’aopoopo i tū ma aga māsani a le All Blacks. E fa’aaogā lava i isi taimi le Kapa O Pango, i le maliliega o le ‘au.

 

KAPA O PANGO

Taringa whakarongo!

Kia rite! Kia rite! Kia mau!

Hi!

 

Kia whakawhenua au i ahau!

Hi, aue! Hi!

 

Ko Aotearoa, e ngunguru nei!

Hi, au! Au! Aue, ha! Hi!

 

Ko kapa o pango, e ngunguru nei!

Hi, au! Au! Aue, ha! Hi!

 

I ahaha!

 

Ka tu te ihi-ihi

 

Ka tu te wanawana

 

Ki runga i te rangi, e tu iho nei, tu iho nei, hi!

Ponga ra!

 

Kapa o pango! Aue, hi!

Ponga ra!

 

Kapa o pango! Aue, hi!

Ha!

 

Se’i o’u toe fo’i i lo’u ulua’i mānava

Se’i toe fo’i lo’u mauli i le ‘ele’ele

O Niu Sila lenei ua pāpā ai faititili

Ua o’o mai i lo’u taimi

O lo’u avanoa lenei

Ua fa’aosofia le mitamitaga

O le uiga lenā o le All Blacks

Ua o’o mai i lo’u taimi

O lo’u avanoa lenei

Ua patae le naunauta’iga

Ua lagona le mana

Ua tupu a’e lo mātou mālosi

Ua mānu a’e lo mātou mālō a’ia’i

Ia fa’amaualugaina le tofiga

Laugasēsē siliva

All Blacks

Laugasēsē siliva

All Blacks

Aue hi.

 

O le fa’amatalaga lenā o le Kapa O Pango